Naalakkersuisut 2009-mi Inatsisartunit isumaqatigiissunit peqquneqarput siullertut 2011-mi kræfti pillugu nassuiaasiussasut, aamma taanna tunuliaqutaralugu kingusinnerpaamik 2013-imi kræfti pillugu pilersaarusiussasut. Kræfti pillugu nassuiaammi Kalaallit Nunaanni kræftimik katsorsaanermi killiffik sammineqarpoq, aamma pitsaaliuinermut, nappaammik suussusersiinermut, katsorsaanermut aamma paaqqutarinninnermut, piginnaanngorsaanermut aamma anniaatinik nipaallisaalluni katsorsaanernut pisariaqartinneqartunut suliniutit arlallit allaaserineqarlutik.
Taakku saniatigut aningaasat maannakkut immikkoortinneqarsimasut, kiisalu Danmarkimi kræfti pillugu pilersaarutit malitsigisaannik Danmarkimi ingerlanneqarsimasoq ineriartorneq aallaavigalugu nuna tamakkerlugu kræfti pillugu pilersaarutip atulersinnerata malitsigisaanik aningaasaqarnikkut pisariaqartitsinertut naatsorsuutigineqartut naatsumik allaaserineqarlutik. Kræfti pillugu pilersaarummi 2013-imeersumi pingaarnertut anguniagaavoq pitsaaliuinerup pitsanngorsarneqarnissaa, siusissukkut nappaammik suussusersiisarnissaq, napparsimasup katsorsarneqarnerata ingerlanera, piginnaanngorsaaqqinneq, anniaatinik nipaallisaalluni katsorsaanermi suliniutit aamma napparsimasumik, aamma taanna pillugu suleqateqarneq – tassunga ilanngullugu nunani tamalaani innersuussutit tulluarsarneqarsimasut aallaavigalugit kræftimik katsorsaanerup qulakkeerneqarnissaa, pingaartumik pilattaasartumut ataatsimut pilattaanerit amerlassusiat pillugit, kiisalu tamanna periarfissaatillugu Kalaallit Nunaanni nakorsaatit atorlugit kræftimik katsorsaanermik qulakkeerineq.
Siunertaq
Nalilersuinermi siunertaq marloqiusaavoq: 1) Kalaallit Nunaanni kræftimut tunngasuni ilisimasanik pioreersunik allaaserisat misissornerisigut nalilersuineq, aamma 2) piffissami 1. apriili 2018-imiit 31. marsi 2019-imut kræftimik nappaateqartut journaliisa misissornerisigut kræftimik napparsimasut katsorsarneqarnerisa sivisussusiannik nalilersuineq.
Kalaallit Nunaanni kræftimut tunngasuni allaaserisat attuumassuteqartut nutaajunerusut misissornerisigut nalilersuinermi anguniakkap ilaa siulleq nassuiarneqassaaq. Tassaniipput ilisimatuussutsikkut allaaserisat aamma nalunaarusiat siammasissumik kræftimut tunngassuteqartut, siusissukkut nappaammik paasisaqarnermiit katsorsaanermut, kiisalu anniaatinik nipaallisaanermut. Anguniakkat ilaata aappaa piffissami 1. apriili 2018 – 31. marsi 2019-imi kræfteqalersutut nutaatut paasineqartut journalii elektroniskiusut atorlugit paasissutissanik aaqqissuussamik katersukkat atorlugit nassuiarneqassaaq. Marloqiusamik periutsit taakku nalilersuinerup siunertaanik akissutissarsinermut imminnut tapertariipput.
Periuseq
Killiffissiuinermut nalilersuinermullu matumunnga tunuliaquttatut periutsit assigiinngitsut atorneqarput. Kræftimut tunngasutigut ilisimatusarnernit nalunaarusianillu attuumassuteqartunik allaaserisanik, kræftimik nappaateqalersimasutut paasineqarsimasut journaliinik misissuisoqarpoq, tassunga ilanngullugit piviusunit piviusunit assersuutit toqqarneqartut, aamma journalinik misissuinermi inernerit tunuliaqutaralugit inunnik suliamut pingaarutilinnik siunersiuisoqarluni.
Suliniutip ingerlanneqarfissaatut piffissaliussaq, aamma tamanut saqqummiunneqarnissaanut piffissaliussaasimasinnaasoq
Decembari 2020
Suleqatigineqarsimasinnaasut
Nunatsinni Nakorsaaneqarfik
Peqqissutsimut Naalakkersuisoqarfik