Meeqqanik kinguaassiuutitigut atornerluisarneq aamma inuusuttut eqqarsartaatsimikkut napparsimasarnerat Kalaallit Nunaanni innuttaasut peqqissusianni unammilligassaapput annertuut. 90'ikkunnili Kalaallit Nunaanni Innuttaasut peqqissusiannik misissuisarnerit takutinnikuuaat, meeraanermi misigisartakkat pitsaanngitsut annertuut imminut toqunnissamut annertuumik atassuteqartut. 60’ikkut naajaartorneranni imminut toquttut tunillaassuuttutut amerlassuseqarlutik amerliartornerat aallartimmalli suli ullumikkumut Kalaallit Nunaat nunarsuaq tamakkerlugu imminut toqunnikkut toqusoqarnerpaasartut ilaattut akiuuppoq.
Kalaallit Nunaanni inuusuttut 15-it 34-llu akornanni ukiullit 51%-ii meeraanerminni artukkerneqarnermik annertunngitsumik misigisaqarsimasut, pingajorarterutai sinnilaarlugit annertuumik nakuusernertalimmik aamma imigassamik aalakoornartortalimmik ajornartorsiuteqarfiusuni peroriartorsimasut erseqqissumik takutinnikuuarput. Immikkoortuni tassaniittut tamarluinnangajammik artukkiinerit taakku marluk misigisimallugit nalunaarutigivaat, aamma 50%-ngajaat 18-it inorlugit ukioqarnerminni kinguaassiuutimikkut atornerlugaasimallutik. Tamatuma ilimanarsisippaa Kalaallit Nunaanni inuusuttut ilarpassui mianernartumik inissisimasimassasut.
Siunertaq
Suliniummi matumani periarfissat aamma aporfissat misissorneqarnissaat siunnersuutigineqarput, aamma misissuinerit peqataatitsiffiusut atorlugit sumiiffinni inuiaqatigiit peqataatillugit meeqqanik kinguaassiutitigut atornerluisarneq pitsaaliorniarlugu aamma inuusuttunut eqqarsartaatsikkut peqqissutsimik tapersersuutaasunik- aamma kiffartuussissutinik pitsanngorsaaniarluni Kalaallit Nunaanni sumiiffinni inuiaqatigiinni amerlasuunik aamma amerlanngitsunik inulinni qanoq suliaqartoqarnersoq takuniarlugu.
Periuseq
Periuseq pingasunik immikkoortoqarpoq. Immikkoortoq 1-i ajornartorsiutip annertussusianik, aamma paasissutissat nassuiaataasut aamma suliassamik qulaajaaneq ikiorsiullugit nuna tamakkerlugu iliuuseqarnissamik takutitsiffiussaaq. Immikkoortoq 2-mi illoqarfimmi mikisumi ataatsimi aamma illoqarfimmi angisuumi ataatsimi, immikkoortumi 1-imi nassaarineqartussanik, paasissutissanik katersuisoqassaaq. Immikkoortoq 3-mi paasissutissat misissoqqissaarneqassaapput, aamma illoqarfiit taakku marluk, misissuinermi akuutinneqartut, peqatigalugit kiisalu nuna tamakkerlugu inuiaqatigiit peqataatillugit ilisimatusarnermik tunngavilimmik oqaloqatigiissutigineqarlutillu ataqatigiissarneqassapput. Oqaloqatigiinnerup tamatuma kulturikkut naleqquttumik tunngaveqarluni ingerlanneqarsinnaanissaa qulakkeerniarlugu illoqarfiit peqataatitaqartut tikeraaqqinneqarnissaat pilersaarusiorneqassaaq.
Suliniutip ingerlanneqarfissaatut piffissaliussaq, aamma tamanut saqqummiunneqarnissaanut piffissaliussaasimasinnaasoq
Inerniliussanik saqqummiussinissaq aamma inerniliussat oqaloqatigiissutiginissaat 2024-p aallartinnerani pissasoq pilersaarutigineqarpoq