Beskrivelse:
Kalaallit Nunaanni Innuttaasut peqqissusiannik misissuisarnerit innuttaasut inersimasut nappaatigisartagaannik, aamma napparsimalernissaannut aarlerinaatinut pissutaasinnaasut assigiinngitsut agguataarnerinik takutitsiffiusarput. Misissuisarnerit napparsimasarnerit aamma peqqissutsip piffissap sivisunerusup ingerlanerani ineriartornerannik malinnaaffiginninnissamik periarffissaqalersitsipput, aamma Kalaallit Nunaanni innuttaasut peqqissutsimikkut qanoq innerannik uuttuinissamut atorneqarsinnaallutik, taamalu pitsaaluinermik suliaqarnermi pingaarutilimmik tunngaviullutik. Misissuineq taamaalilluni innuttaasut peqqissuunissaannik suliniummi ’Inuuneritta II’-mi, Naalakkersuisunit pingaarnerutissallugit toqqarneqarsimasaannik, tassalu 1) imigassaq aalakoornartortalik aamma hashi; 2) pujortartarneq; 3) nerisarisartakkat, aamma 4) timimik aalatitsisarneq, nakkutilliinissamut pingaaruteqarpoq.
Innuttaasut peqqissusiannik misissuisarnerit maannamut tallimat, 1993-imiit 1994-imut, 1999-imiit 2001-imut, 2005-imiit 2010-mut, 2014-imi aamma 2018-imi ingerlanneqarnikuupput. Innuttaasut peqqissusiannik misissuinerit arfinilissaat 2024-mi septembarimi aallartinneqassaaq. Paasissutissanik katersuineq 2026-p tungaanut ingerlanneqassaaq.
Formål:
Innuttaasut peqqissusiannik misissuinerni pingaarnertut sammineqartartut tassaapput uummatikkut nappaatit aamma diabetisi, tassunga ilanngullugit aarlerinaatinut pissutaasut, soorlu nerisarisartakkat, pujortartarneq, imigassaq aalakoornartortalik aamma timimik aalatitsisarneq. Aammali misissuinerni misigissutsinik attuisinnaanerusut ilaapput, soorlu imminut toqunnissamut pissusilersuutit, kinguaassiuutitigut innarliisarnerit aamma nakuusertarnerit. Utoqqaat timimikkut piginnaasaqassusiisa aamma inuusuttut eqqarsartaatsimikkut peqqissusiisa misissuinerni sammineqartarnerat 2018-i aallarnerfigalugu annertunerulersinneqarpoq.